حوارات

لا اعاقة مع الارادة رمضان ” اتعب واعافر بس ممدش ايدي ” .. ” عايز اسدد الديون الي عليا ” .. ” مش عايز غير كشك ابيع فيه حاجتي “

” ليس المعاق من فقد عضوا , المعاق من فقد خلقا ”
هذه الجملة معبرة جدا عن قصه انسانمعاق فقد احدي ارجله وبالرغم من هذا
فهو لم يلجا الي اسلوب الشحاتة ومد اليد للغير , فهذا الاسلوب الذي يقلل من احترام الشخص لنفسه .

كل ما اريده هو ان تعرفوا بان المعاق عقل يفكر , قلب ينبض , وصدق يحكي قصة انسان ” انا اسمي رمضان حسن محمد الشهرة ب رمضان السكري , عندي 17 سنة , من سوهاج بس بقالي 5 سنين عايش في اسيوط ” .
– تنقل لكم جريدة ” المحور الجديد ” اجواء حوار احدي الصحفيات مع رمضان الذي يواجه ظروف الاعاقة .

-قولنا بقي ايه الي خلاك تسيب سوهاج وتيجي اسيوط ؟
ابويا كان جاي اسيوط وقولتله خدني معاك واشتغلت هنا , ابويا مكنش يقدر يشتغل عشان هو تعبان فقررت ان انا الي انزل اشتغل وخصوصا عشان عندي اخوات بنات وطبعا عاوزين مصاريف وانا اكبر واحد في اخواتي ف اكيد انا الي هشيلهم , ف جيت علي اسيوط من 5 سنين عشان الشغل .

-انت متعلم يا رمضان ؟
ايوة انا في 2 ثانوي تجارة مدرستي في سوهاج , في الاجازة بس باجي اسيوط عشان اشتغل لكن في الدراسة مش بشتغل .

محررة المحور مع رمضان

-حد شجعك انك تشتغل ولا دا قرار من نفسك ؟
لالا محدش قالي اشتغل انا الي قررت اشتغل عشان المصاريف .
انت بتبيع ايه يا رمضان ؟
ببيع شوية تيشرتات علي شوية قمصان رجالي وببيع عكاكيز العصي دي .

-بتجيب البضاعة دي منين ؟
اعرف واحد في القاهرة بتعامل معاه .
بتكسب ؟ يعني قد ايه دخلك يوميا تقريبا ؟
والله انا ممكن في اليوم اكسب 50 جنية الفلوس دي مش بكسب منها غير 20 جنية بس ال 30 جنية دي بتبقي تمن البضاعة اصلا الي انا بشتريها بيها .
يعني انا مش بكسب غير 20 جنية بس , احيانا بقي مش بكسب يعني مش ببيع خالص في اليوم ودا بيبقي صعب لان بسبب كدا انا بقعد اليوم كله مش باكل .

-بس غريبة انك بتشتغل , كان ممكن تشحت احسن من التعب دا ؟
لا طبعا انا ممدش ايدي لحد واشحت علي الاقل عشان مقلش من نفسي , انا فضلت اني اتعب واعافر واكب من نفسي مش امد ايدي واخد عرق غيري , الشغلانة دي مش بتكسب اه بس احن من اني اشحت .

-لو قولتلك قول اي كلمة او رسالة للشباب الي مش لاقيين شغل وقاعدين في البيت , هتقول ايه ؟
انا احب اوجه للشباب بمناسبة الشغل متياسش وخلي عندك طموح عالي وتفائل طبعا واشتغل اي حاجه اي حاجه حتي لو هتشتغل شغلانه قليله او مثلا لكن بلاش التشاؤم .

-لو حد جه قالك انا مسؤل , او قابلت حد مسؤل , عادي ولا هتتكلم معاه في حاجه ؟
هتكلم معاه انا مش ضامن وقفتي وانا ببيع كدا في الشارع لو جالي بتوع المرافق هيشلولي كل حاجه عشان انا فارش في الشارع , لكن لو بقي عندي كشك صغير ابيع فيه حاجتي مش هخاف من حاجه .
انا مش عاوز غير كشك بس ابيع فيه الحاجه علي الاقل عشان اعرف اسد الديون الي عليا .


-اسفه علي السؤال , ايه الحادثه الي حصلت لرجلك ؟
كنت انا وابويا بنشتغل في القاهرة بنبيع مانجا ’ في مرة بعدي السكة الحديد هناك ف القطر مشي علي رجلي واتقطعت كفة رجلي بس , وجينا اسيوط عشان اتعالج سمعنا عن مستشفي القصر , لكن الدكاترة منهم لله اهملوني ومهتموش بيا لغايه مابقيت رجلي تعفن جه الدكتور قالي العفونه هتنتشر وهتنقل امراض لجسمي كله , شويه شويه وبقيو يقطعولي جزء من رجلي لغاية مابقيت كدا .
-مفكرتش تعمل عملية رجل صناعية ؟
عملت عملية هنا في اسيوط بس منفعتش معايا , الدكاترة قالولي لازم بعد 18 سنة عشان يكون اكتمل نموك والا كدا مش هينفع تعمل عملية .

– تحب تقول اي حاجه اضافيه ؟
احب اقول تحياتي ليكم , واتمني ان حد يساعدني من المسؤلين انا مش عايز اكتر من الكشك عشان امشي حالي .

اظهر المزيد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق